ଅଗ୍ନିପଥ ଯୋଜନାକୁ ନେଇ ତୀବ୍ର ପ୍ରତିବାଦ ଯୋଗୁଁ ୭୪୨ ଟ୍ରେନ ବାତିଲ୍ , ସମ୍ପୁର୍ଣ୍ଣ ଟିକେଟ ଟଙ୍କା ଫେରସ୍ତ କରିବ ରେଳବାଇ

ନୂଆଦିଲ୍ଲୀ , ୨୦/୦୬: ସେନାବାହିନୀରେ ନିଯୁକ୍ତିର ନୂତନ ଯୋଜନା ବିରୁଦ୍ଧରେ ଦେଶର ଅନେକ ଅଞ୍ଚଳରେ ବିରୋଧ ପ୍ରଦର୍ଶନ କରାଯାଉଛି। ଏହା ରେଳ ସେବା ଉପରେ ମଧ୍ୟ ପ୍ରଭାବ ପକାଇଛି । ଆନ୍ଦୋଳନ ସମୟରେ ଅନେକ ସ୍ଥାନରେ ରେଳ ସମ୍ପତ୍ତି ନଷ୍ଟ ହୋଇଯାଇଥିଲା। ରେଲୱେ ଟ୍ରାକଗୁଡିକ କ୍ଷତିଗ୍ରସ୍ତ ହୋଇଛି । ବହୁ ସଂଖ୍ୟକ ଟ୍ରେନ୍ ବାତିଲ କରାଯାଇଛି । ରେଳ ମନ୍ତ୍ରଣାଳୟର NTES ପୋର୍ଟାଲ ଅନୁଯାୟୀ, ସୋମବାର ଅପରାହ୍ନ ପର୍ଯ୍ୟନ୍ତ ୭୪୨ ଟି ଟ୍ରେନ୍ ସମ୍ପୂର୍ଣ୍ଣ ବାତିଲ ହୋଇଛି। ୨୮ ଟି ଟ୍ରେନ୍ ଆଂଶିକ ବାତିଲ୍ ହୋଇଛି । ରବିବାର ଦିନ ୪୮୩ ଟ୍ରେନକୁ ମଧ୍ୟ ବାତିଲ କରିବାକୁ ପଡିଥିଲା । ସୋମବାର ରେଳ ଯାତ୍ରୀଙ୍କ ସୁବିଧା ପାଇଁ ରେଳ ମନ୍ତ୍ରଣାଳୟ ଦ୍ୱାରା ନିର୍ମିତ ଅଫିସିଆଲ୍ ଟ୍ୱିଟର ଆକାଉଣ୍ଟରେ ରେଳ ସେବାରେ ବାତିଲ ହୋଇଥିବା ଟ୍ରେନର ଟିକେଟ୍ ପାଇଁ ଟଙ୍କା କିପରି ଫେରସ୍ତ କରାଯିବ ତାହା କୁହାଯାଇଛି। ଟୁଇଟ୍ ଅନୁଯାୟୀ, ଟ୍ରେନ୍ ସଂପୂର୍ଣ୍ଣ ବାତିଲ ହେଲେ ସମ୍ପୂର୍ଣ୍ଣ ଟିକେଟ୍ ଟଙ୍କା ଫେରସ୍ତ କରାଯିବ। ଏଥିପାଇଁ, ଟିକେଟ୍ ବାତିଲ୍ କରିବାକୁ କିମ୍ବା ଫେରସ୍ତ ପାଇବାକୁ TDR ଅର୍ଥାତ୍ ଟିକେଟ୍ ଜମା ରସିଦ ଫର୍ମ ପୂରଣ କରିବାର କୌଣସି ଆବଶ୍ୟକତା ନାହିଁ ।